Nun fai falta ser naide
pal amor. Amor puede ser too.
Ella quería les coses a corazón
abiertu:
la figar aparrada cola solombra
enorme,
la pitina esplumada, el canariu, la gata,
la flor de los sabugos que colgaba nes vigues,
la dalia que-y ponía tolos díes a un retratu,
les sábanes de llinu cola inicial bordada.
Queríanos a nós más qu'a naide nel mundu,
y dába-y amor a lo que la rodiaba:
aquel vaso fendíu que fora de la güela,
aquel perrín rizosu cola mirada humana,
aquel porrón de barro pol que bebía'l so pá,
aquella siempreviva que taba na ventana,
aquel paxín de blimes que-y fixeron de neña,
aquel cofre que-y dieron pa cuando se casara.
Nun fai falta ser naide
pal amor y la vida.
